პირადი ცხოვრების უფლების დარღვევა

თუ ფიქრობთ, რომ თქვენი პირადი ცხოვრების შესახებ ინფორმაცია საჯარო გახდა უსაფუძვლო მიზეზის გამო, შეგიძლიათ სამოქალაქო სარჩელი შეიტანოთ ამ ინფორმაციის გამავრცელებლის წინააღმდეგ. სასამართლოში თქვენ შეგიძლიათ მოითხოვოთ ფულადი კომპენსაცია ან ბოდიშის მოხდა და ამ დროს გაითვალისწინოთ როგორც მატერიალური (მაგალითად, შემოსავლის დაკარგვა), ასევე მორალური ზიანი. სასამართლოში მიმართვისას თქვენ უნდა განმარტოთ:

• თქვენი პირადი ცხოვრების შემცველი რომელი ფაქტები და ინფორმაცია გახდა საჯარო;

• როდის და როგორ გასაჯაროვდა ეს ინფორმაცია (თარიღი, დრო, გამომცემლობა და მედია);

• რატომ არღვევს ეს თქვენს უფლებებს;

• რა სახის კომპენსაციას ითხოვთ, ფულადს თუ ბოდიშის მოხდას;

• ამის შემდეგ თქვენ უნდა დაასაბუთოთ, რატომ ითხოვთ კონკრეტულად ამ კომპენსაციას, ხოლო ფულადი კომპენსაციის შემთხვევაში - რატომ ითხოვთ კონკრეტულ თანხას.

თქვენ შეგიძლიათ მიმართოთ საგამოძიებო ორგანოს და მოითხოვოთ გამოძიების დაწყება შემდეგ შემთხვევებში:

• როდესაც თქვენი მიმოწერა განზრახ გასაჯაროვდა;

• როდესაც თქვენი პერსონალური მონაცემები არაკანონიერად იქნა გამოყენებული, რამაც არსებითი ზიანი მოგაყენათ;

• როდესაც თქვენს პირად ცხოვრებასთან დაკავშირებული ინფორმაცია ან საიდუმლო უკანონოდ იქნა შეგროვებული ან გავრცელებული.

გასაჩივრება

საგამოძიებო ორგანო ვალდებულია, თქვენი მოთხოვნით დაიწყოს გამოძიება. ზოგიერთ შემთხვევაში პროკურატურამ შესაძლოა გამოძიება შეწყვიტოს. თუ თვლით, რომ პროკურორის გადაწყვეტილება არ არის დასაბუთებული, შეგიძლიათ გაასაჩივროთ იგი თქვენს საქმეზე ზედამხედველ პროკურორთან. ზედამხედველი პროკურორის გადაწყვეტილება საბოლოოა, თუ საქმე არ ეხება განსაკუთრებით მძიმე დანაშაულს. ამ შემთხვევაში თქვენ კვლავ შეგიძლიათ გაასაჩივროთ ზედამხედველი პროკურორის გადაწყვეტილება სასამართლოში. 

თუ საგამოძიებო ორგანო დაიწყებს გამოძიებას, ამ შემთხვევაშიც შეგიძლიათ მოითხოვოთ კომპენსაცია საქართველოს სამოქალაქო საპროცესო კოდექსის მიხედვით.