საქართველოს სისხლის სამართლის კოდექსი ითვალისწინებს სისხლის სამართლის პასუხისმგებლობას, თუ მოძალადემ დაარღვია დამცავი და შემაკავებელი ორდერი. იგივე ეხება ბავშვის განცალკევების შესახებ სოციალური მუშაკის გადაწყვეტილების დაუმორჩილებლობის შემთხვევებსაც.
ვინაიდან დამცავი და შემაკავებელი ორდერები უზრუნველყოფს მსხვერპლის უსაფრთხოებას, მათი დარღვევა მიიჩნევა სისხლის სამართლის დანაშაულად. შედეგად, აღიძვრება სისხლის სამართლის საქმე და დამნაშავეს დაეკისრება პასუხისმგებლობა.
სისხლისსამართლებრივი პასუხისმგებლობა და ადამიანის უფლებები
სიცოცხლის უფლება, არაადამიანური ან ღირსების შემლახველი მოპყრობის აკრძალვა და პირადი და ოჯახური ცხოვრების უფლება
ეფექტური სისხლის სამართლის პროცესის წარმართვა და მოძალადეების სისხლისსამართლებრივი პასუხისმგებლობა არის სახელმწიფოს არსებითი საშუალება მსხვერპლთა უფლებების დასაცავად და ადამიანის უფლებების დარღვევის თავიდან ასაცილებლად. თუ შესაბამისი ორგანოები ვერ იცავენ მსხვერპლს ეფექტური გამოძიებით, ბრალდების წაყენებით და საჭიროების შემთხვევაში, დამნაშავის გასამართლებით, ამან შეიძლება გამოიწვიოს სიცოცხლის უფლების, არაადამიანური ან ღირსების შემლახველი მოპყრობის აკრძალვის და პირადი ცხოვრების უფლების დარღვევა
დისკრიმინაციის აკრძალვა
ოჯახური ძალადობა ქალების დისკრიმინაციის ფორმად ითვლება, რადგან ის, ძირითადად, ქალებს ეხება. თუ სახელმწიფო (ამ შემთხვევაში, შესაბამისი ორგანოები) არ განახორციელებს ქმედით სამართალწარმოებას და დამნაშავეს პასუხისმგებლობაში არ მისცემს, ამან შეიძლება გამოიწვიოს დისკრიმინაციის აკრძალვის დარღვევა, სიცოცხლის უფლების, არაადამიანური ან ღირსების შემლახველი მოპყრობის აკრძალვის და პირადი და ოჯახური ცხოვრების უფლების დარღვევასთან ერთად.
სამართლიანი სასამართლოს უფლება
თუ ოჯახში ძალადობის მსხვერპლნი აღიარებულნი არიან დაზარალებულად სისხლის სამართლის პროცესში, მათ აქვთ მთელი რიგი უფლებები, რომლებიც დაკავშირებულია სამართლიან სასამართლოსთან. მაგალითად, გარკვეულ პირობებში, მათ აქვთ უფასო იურიდიული დახმარების მიღების უფლება. თუ სახელმწიფომ ვერ უზრუნველყო მსხვერპლთა მიმართ სამართლიანი სასამართლოს გარანტიები, ამან შეიძლება გამოიწვიოს სამართლიანი სასამართლოს უფლების დარღვევა.
გზამკვლევის შესახებ
გზამკვლევის ამ ნაწილში განხილული იქნება დანაშაულის სახეები, რომლებიც შეიძლება ჩადენილი იყოს დროებითი დაცვის შესახებ ორდერების დარღვევით.